Ka ora ngā Kōrero Hītori o Ngāti Konohi mā roto mai i ngā Mahi Whakaako Waiata i te Kapa Haka o Whāngārā-mai-tawhiti

Ko te whāinga matua o tēnei tuhinga, ko te wānanga, ko te tātari i te huarahi whakaako i ngā kōrero hītori, i ngā kōrero tuku iho i roto i ngā mahi kapa haka. Ko ngā huarahi pēnei i te haka, i te waiata, i te mōteatea e whakatauira nei i te āhuatanga o te ako ā-waha, ā-hinengaro, ā-kupu, ā-whatu hoki. Hei whakatauira ake i tēnei kaupapa rangahau, ka noho ko taku kapa haka o Whāngārā-maitawhiti hei kapa patapātai māku mō tēnei kaupapa rangahau. Ka rua, ka whakamāramatia ake ngā huarahi e whāia ana e rātou ki te whāngai, ki te pupuri i ngā kōrero hītori o Ngāti Konohi. Kua tīpakohia tētahi momo titonga nō ia tau i tū ai Te Kapahaka o Whāngārāmai- tawhiti mai te tau 1995 ki te tau 2011. Hei tauira ko ētahi o ngā kaupapa titonga waiata e hāngai ana ki te hītori o Paikea mai i Hawaiki ki Whāngārā. Ka noho ko Paikea hei kupu whakarite mō te matenga o tētahi kaumātua nō Ngāti Konohi. Ka noho hoki ko ngā hononga i waenga i a Ngāti Konohi me ētahi atu iwi hei kaupapa mō ētahi/ tētahi o ngā waiata/ haka/ mōteatea. Ko te mea nui, he titonga waiata ēnei e puta ai, e pupuri ai ngā kōrero hītori a Ngāti Konohi ake, ā, he mea tuku iho i roto i te wā, mai tēnā whakatipuranga ki tēnā whakatipuranga. Hei te mutunga, ka kitea mēnā he tika, he hē rawa rānei tāku whakapae, ‘Ka ora ngā kōrero hītori o Ngāti Konohi mā roto mai i ngā mahi whakaako waiata i te kapa haka o Whāngārā-mai-tawhiti.’ Inā e pūkana nei, inā e whātero nei, inā e ngangahu nei, inā e ora nei!